有一種餓,叫「你呀媽話你餓」…
每逢新曆七月到農曆七月,好多菇都表示頭痛,班班機爆就梗㗎啦,但其實正係校門大開細路仔坐飛機嘅時候,就代表好多小朋友坐飛機去旅行,雖然豆腐超中意小朋友成日抱人地個B,不過每每見到嗰啲成程都揸住iPad然後你問佢十句都唔應嘅細路,相信十個有九個菇同我都一樣會激到嘔血...
———某日由香港飛去日本———
有一家四口老豆呀媽帶住一對六七歲仔女坐我地商務艙,老老實實個對仔女就真係好乖好有禮貌,雖然成程都揸住iPhone加iPad,但問佢要乜佢地都會識答,到派餐嘅時候
豆腐「細佬,你今日想食d乜呀,我地有個係日式魚飯啦,牛扒啦同埋雞肉飯喎」
細佬「我唔食啦!!!」
呀媽「佢想食飯呀」
細佬「我唔餓呀!!!」
呀媽「岩架啦,比個魚飯佢啦,你肚餓呀」
細佬「我唔餓呀!!!」
好啦,咁呀媽叫到,都要比個魚飯呀仔食啦,之後到呀女啦...
豆腐「咁家姐呢,你想食雞飯呀,牛扒定係魚飯呀?」
家姐「我想食雞肉飯呀唔該」
呀媽「比個魚飯佢呀!!!」
家姐「我想食雞肉喎」
呀媽「日本嘅魚飯呀!!!日本野喎」
家姐「我唔想食魚呀」
豆腐「咁…」
豆腐呢個時候都冇辦法,都係要比個魚飯呀家姐食,話哂佢唔會投訴我,如果我比個雞飯佢,佢呀媽就會投訴我架嗎,但到收野嘅時候當然兩姐弟都冇食過個餐,好明顯一個唔想食野,一個唔想食魚,正想收野之際,呀媽又黎料啦
呀媽「唔好意思呀,佢地仲食架」
呀仔同呀女好齊心咁講「我唔食啦,哥哥幫我收左佢呀唔該」
呀媽「仲食呀,你餓呀」
返到廚房,四個呀姐聽到呢個故事之後,佢地話兩個細路的確係肚餓,不過呢種餓係叫做「佢呀媽話佢餓」喎 🙈 計我話,其實應該係話比左錢就算唔食都要左先,起碼唔好蝕底呀嗎 😏😏😏😏
Search